മഴയൊപ്പന

 നാലക മുറ്റത്തൊരു കാറ്റെത്തി.
ചാറ്റൽ മഴയും കൂടെയെത്തി.

വെള്ളി ഉറുപ്പിക മാത്താവിട്ട്,*

ചമഞ്ഞൊരുങ്ങി മിന്നലുമെത്തി.

കാതിൽ ചിറ്റു മലിക്കത്തിട്ടു,

വള്ളിത്തുടരിൻ കുമ്മത്തിട്ടു,

കമ്പിത്തിരിയായ് കാതില മിന്നി,*

പുള്ളിത്തട്ടം ലങ്കിമറിഞ്ഞു.

കാന്തവിളക്കായ് മിന്നിക്കത്തും,

മിന്നൽകൊടിയെ നടുവിലിരുത്തി,

ഇറയിൽ ഊഞ്ഞാൽ വള്ളികൾ കെട്ടി,

മയിലാഞ്ചിക്കൈ കൊട്ടിപ്പാടി,

മഴ മൊഞ്ചെത്തികളൂഞ്ഞാലാടി.

പനിനീർ കൂജകൾ തട്ടി മറിഞ്ഞ് 

പുതുമണ്ണത്തറ്ഗന്ധമണിഞ്ഞ്‌ 
മഴ വില്ലുറുമാൽ ചേലിൽ കെട്ടി 
ആകാശക്കറു -കാറിൽ കയറി,
ഇടി മണവാളൻ  വിരുന്നിനെത്തി.

ദഫ്ഫും തുടിയും പെട്ടിപ്പാട്ടും,
ചീനിക്കുഴലും മുട്ടും വിളിയും.
കൊമ്പും കുഴലും ചെണ്ടക്കാരും,
അറബന മേളം, താളം മേളം .
തുള്ളിക്കൊരു കുടം കല്യാണപ്പുര...........

* വെള്ളി നാണയം പോലെ പ്രിന്റു ചെയ്ത കസവു തുന്നിയ വിവാഹ വസ്ത്രം..
*മലബാറിലെ പഴയ കാല മുസ്‌ലിം ആട ആഭരണങ്ങൾ.

റിയാലിറ്റി ഷോ ........

സന്ധ്യക്ക്‌ പതിവുള്ള കലഹത്തിനിടെ അവള്‍ പറഞ്ഞു.

''മടുത്തൂ എനിക്ക് നിങ്ങളോടൊത്തുള്ള ജീവിതം............'' 
മുറ്റത്തെ ഇരുട്ടിലേക്കോടിയിറങ്ങി,ഒരു വലിയ കല്ല്‌ കിണറ്റിലേക്ക് മറിച്ചിട്ട്, കിണറോരം മറഞ്ഞ് അവൾ  ഇരുന്നു .  
അയാളെ ഒന്ന് പേടിപ്പിക്കണമെന്നേ   അവൾ നിനച്ചിരുന്നുള്ളൂ.   

എല്ലാം കണ്ട്‌,അന്തി വിളക്കത്തിരുന്ന്  വലിയ വായില്‍ നിലവിളിച്ചുതുടങ്ങിയ മക്കളെ അയാള്‍ സമാധാനിപ്പിച്ചു.
''മക്കള് കരയല്ലേ.........ഇനിയിപ്പോ നാളെ നേരം വെളുത്ത് ,പോലീസും മെഡിക്കല്‍ കോളേജും പോസ്റ്റ്‌ മോര്‍ട്ടവും എല്ലാം കൂടി കെട്ടിയെടുക്കാന്‍ ഒരു പാടു വൈകും........''
''ഫാസ്റ്റ് ഫുഡില്‍ നിന്നും വല്ലതും വാങ്ങിക്കഴിച്ചിട്ട് തല്‍ ക്കാലം  നമുക്ക്  സുഖമായി ഉറങ്ങാം..................'' 
അയാൾ നിന്നു ചിരിച്ചു . 
മുറ്റത്തെ ഇരുട്ടില്‍, ശ്വാസം നിലച്ചു പോയി അവള്‍ക്ക്  .............

ഒതുക്കു കല്ലുകളില്‍ വേച്ച്, എങ്ങോട്ടെന്നില്ലാതെ ഇറങ്ങി നടന്നു അവള്‍ ... 

സ്റ്റാഫ്റൂം

വടി വെച്ച് അളന്നും, 
വര വെച്ച് മുറിച്ചും,
ഗൌരവത്തിന്‍റെ  പര്യായമായി  
വള്ളിച്ചൂരല് പോലെ , 
ഒരു ഹെഡ്മിസ്ട്രസ്സ് .......
വാക്കില്‍പുകയും, 
നോക്കില്‍ പുകച്ചിലുമായി ,
സള്‍ഫ്യുരിക് ആസിഡ് 
പോലെ അനന്തന്‍  മാഷ്‌...............

ഒരു പാട് ഹരിച്ചും, 
അത് കൊണ്ട് ഗുണിച്ചും, 
കൂട്ടീട്ടും കിഴിച്ചിട്ടും- 
കഴിഞ്ഞതെല്ലാം കണക്കായി 
പോയെന്നു സുഗുണന്‍മാഷ്‌........... 

എന്ത് വിളഞ്ഞ മക്കളാണപ്പാ- 
കാലം അരിവാള് പോലെ, 
വളഞ്ഞു പോയെന്നു. 
മധുര മലയാളത്തില്‍ ,
മധു മാഷ്‌ ..........

മധു   മാഷെ  കെട്ടിയതില്‍ പിന്നെ, 
ജീവിതത്തിന്റെ ക്വഥനാങ്കം ,
തന്നെ മാറി പോയെന്നു, 
മെറീന ടീച്ചര്‍ ............

പിച്ചകപ്പൂ എം ബ്രോയിഡറി, 
ചെയ്ത ഇളം നീല സാരിയില്‍ . 
ഇനിയും എത്തിയില്ലല്ലോ 
നമ്മുടെ സുസ്മിത ടീച്ചര്‍ ...........  

Iam ten minuts late,
എന്ന്  സ്റ്റാഫ് സെക്രട്ടറിയുടെ 
മൊബൈലില്‍ മിന്നുന്നുണ്ട് 
ടീച്ചറുടെ മേഘ മല്‍ഹാറ് .........

ഫസ് റ്റ് , സെക്കന്‍ഡ്‌ ബെല്‍ , പ്രാര്‍ഥന  ............
വന്നല്ലോ, 
സൂര്യകാന്തിപ്പാടം
പൂത്ത പോലൊരു പുടവയില്‍ 
ചൊടിയില്‍ വിയര്‍പ്പും 
ചന്തവും ചാലിച്ച് സുസ്മിത ടീച്ചര്‍ ............

ഇടിമഴപ്പിറ്റേന്നു,
ലില്ലിപ്പൂ വിരിഞ്ഞ, 
ബംഗ്ലാപറമ്പ് പോലെ, 
ആയല്ലോ നമ്മുടെ സ്റ്റാഫ് റൂം.......... 

പുതിയ സാരിയില്‍ , ടീച്ചര്‍ക്ക് 
പത്തു മിനിട്ടല്ല, 
പത്തു വയസ്സ് കുറഞ്ഞെന്നു, 
കണ്ണാടി മാറ്റുന്നുണ്ട് ,
കണ്ണ് മിഴിക്കുന്നുണ്ട്,
നമ്മുടെ പോക്കര് മാസ്സ്റ്ററ്..........  

ഇതിപ്പോ ഞാനോ മറ്റോ, 
ആയിരുന്നെങ്കില്‍ ,
കാണാമായിരുന്നു പുകില്‍ , 
എന്നൊരു  കുറുമ്പില്‍ , 
ഒന്ന് കൂടി കറുക്കുന്നുണ്ട് .
കുട്ടികളുടെ പെന്തക്കോസ്ത് .
നമ്മുടെ കത്രീന ടീച്ചറ് .........

നിങ്ങളൊക്കെ ഇങ്ങനെ 
നിന്നു  വൈകിയാല്‍ ,
പിള്ളേരൊക്കെ കിടന്നു വൈകൂലേന്നു 
വാച്ച് നോക്കുന്നുണ്ട്, മുരടനക്കുണ്ട് 
മൂലയിലെ വള്ളിച്ചൂരല് 
മുഖം കറുത്തിട്ട്
കണ്ണട വെച്ചിട്ട് ............

ക മ്മ്യൂ ണിസ്റ്റ് മറിയം

'' വലിയംപാടത്തെ കാദര്‍ കോണ്‍ഗ്രസ്സായി.''

ഓത്തു കഴിഞ്ഞു വരുമ്പോള്‍ അറക്കല്‍ പാലത്തിനടുത്ത് വെച്ചാണ് ബദറു ആ വര്‍ത്തമാനം കേട്ടത്.

കടോത്ത്-നിരത്തുമ്മല്‍ ഒക്കെ സംസാരം.പുഴ വക്കത്ത് ചകിരി തല്ലുന്ന പെണ്ണുങ്ങള്‍ പണിയും കലപിലയും നിര്‍ത്തി വെച്ച് കുശു കുശുപ്പിലാണ്.....

''കമ്മ്യുണിസ്റ്റാര്‍ക്ക് പൊറുക്കാനാവൂല്ല........''

വയ്യേ പുറത്തെ കോലായില്‍ വെറ്റിലടക്ക അമ്മിയില്‍ വെച്ച് ദേഷ്യത്തോടെ കുത്തിയുടക്കുന്നുണ്ട് ഉമ്മാമ......

''ഒലെങ്ങനാ പൊറുക്കുക.....?ഇത്തറവാട്ടിന് തന്നെ ചേപ്പ്രയായി1*.ഇന്നാട്ടില് കമ്മ്യുണിസ്റ്റം ണ്ടായത് തന്നെ വലിയംപാടത്തെ തറവാട്ടിലാ ........''
ആ കഥ ബദറു ഒരു പാട് കേട്ടതാണ് .

ഉമ്മാമ്മയുടെ മൂത്ത മോന്‍  സഖാവാണ് കടവത്ത് ആദ്യമായി കമ്മ്യുണിസം പ്രസംഗിച്ചത്‌ 

''രാത്രി പാതിരക്കാണ് ഓലെ മീറ്റിംഗ്..ഇന്നട്ട് എല്ലാരും കൂടെ പാനീസും കത്തിച്ചു വെച്ച് ആലോചനോടാലോചന...

വിപ്ലവംജയിക്കട്ടേന്ന്....ഓടൂല്ഇങ്കിലാബായി,സിന്ദാബാദായി,കമ്മ്യുണിസ്റ്റ് ഭരണോം വന്നു......തറവാട്ടിലെ സ്വത്ത് കുറേ കുടി കെടപ്പായി കൊടുക്കേണ്ടിയും വന്ന് ........''

വായിലെ മുറുക്കാന്‍ പിച്ചളക്കോളാമ്പിയിലേക്ക്‌  തുപ്പിക്കൊണ്ട് ഉമ്മാമ ബങ്കീശം2* പറയും.

''അതിന്‍റെ  ഒരു  നെലേം വേലേം ഇന്നും ണ്ട് വലിയംപാടത്തുകാര്‍ക്ക്...''

ഇനിക്കീ കൊണ്ഗ്രസ്സുന്നു കേള്‍ക്കുമ്പോ തന്നെ ഒരു കിക്കിരിപ്പാണ്‌..ഗാന്ധിജി പോയപ്പോ പഴേ കൊണ്ഗ്രസ്സും പോയി....''

''മറിയം കമ്മ്യുണിസ്റ്റാ.... മരിക്കോളും അങ്ങനെ തന്നെ  ചോന്ന പായീല് നിക്കരിക്കണോന്നാ ഇന്റെ പൂതി ........''

  

അന്തിയും മോന്തിയും ഇരുട്ടത്താണ് ഖാദര്‍ക്ക വന്നു കയറിയത്.

വെളുത്ത കുപ്പായവും കഞ്ഞി പശ മുക്കിയുണക്കിയ തുണിയുമുടുത്ത്.
ക ഴുത്തില് കസവിന്റെ മാല...........!

കൂടെ വന്നവര്‍ കോലായിലും അരച്ചുമരിലും മുറ്റത്തെ ആലക്കോലായിലുമെല്ലാം കയറിയിരിക്കുന്നു.

കൊയ്യക്കാരന്‍ ചോയിയെ കൊണ്ട് ഇളനീരിരക്കി ചെത്തിച്ചത് ഉമ്മാമ്മ തന്നെയാണ്.

ഇളനീര്‍ കുടിച്ചു വന്നവരൊക്കെ പിരിഞ്ഞു കോലായില്‍ കാദര്‍ക്കാ ഒറ്റക്കായപ്പോഴാണ് ഉമ്മാമ്മ തുടങ്ങിയത്.

''കാക്കക്കാരനവന്മാര് ഉണ്ടാക്കി  വെച്ച ഒരു പേരുണ്ട് ഇത്തറവാട്ടിന്.....അത് നിയ്യായിട്ടു ഇല്ലാണ്ടാക്കരുത്  .ഇന്‍റെ 

കാദറേ ......''
കാദര്‍ക്ക മറുപടിയൊന്നും പറയുന്നില്ല.
''മരിച്ചു പോയവരുടെ കുരുത്തക്കേട്‌ വാങ്ങി വെക്കരുത്...അനക്ക്‌ ഒന്നും അറിയാഞ്ഞിട്ടാണ്‌.''
തലയിലെ തട്ടം കുടഞ്ഞിട്ടു ഉമ്മാമ്മ ഒച്ച വെക്കുന്നു.
കാദര്‍ക്ക പൊട്ടിച്ചിരിക്കുന്നു.
''ഇത്തറവാട്ടിന് ഒരു പേരുണ്ട്,കണ്ടവര്‍ക്കെല്ലാം കയറി നിരങ്ങാന്‍ നിങ്ങളുടെ മൂത്ത മോന്‍ സഖാവ് ഉണ്ടാക്കി വെച്ച സല്‍പ്പേര്.....''
''ബദരീങ്ങളേ.........''
ഉഹദു മല ഇടിഞ്ഞു വീണത്‌ പോലെന്നു കേട്ടിട്ടുണ്ട് ബദറു.

ഉമ്മാമ്മയുടെ ഒച്ച ഇത്ര ഉറക്കെ ഒരിക്കലും കേട്ടിട്ടില്ല ബദറു.
അടുക്കളയിലും കോലായിലും പണിക്കാരത്തികളുടെ ഒച്ചയനക്കങ്ങള്‍ നിലച്ചു.
കിളി വാതിലുകളായ വാതിലുകള്‍ മുഴുവനും കോലായിലേക്ക് കിറു കിറെന്നു തുറക്കുന്ന ഒച്ചകള്‍ ........
കൊപ്പരക്കൊട്ട മറിച്ചിട്ടത് പോലെ കുട്ടിയറയിലെ കട്ടിലിലേക്ക് മറിഞ്ഞു വീണു ഉമ്മാമ്മ......
''കമ്മ്യുണിസ്റ്റാര് പൊറുക്കൂല്ല...ഞാനും കമ്മ്യൂണിസ്റ്റാണ്.നിക്ക് പൊറുക്കാണ്ടിരിക്കാന്‍  പറ്റുവോ,ഇന്റെ പള്ളേല്‍  പിറന്നു പോയില്ലേ ഓന്......ഇന്റെ മരിച്ചു പോയ മൂത്തോനെ അയിബാക്കീല്ലേ*3 ഓന്....''
സങ്കടമടക്കാന്‍ പാട് പെട്ടു ഉമ്മാമ്മ.


വലിയംപാടത്തു ഒരാള്‍ കൊണ്ഗ്രസ്സാവുന്നത് നടാടെയാണ്.അതിന്റെ  ആര്‍പ്പു വിളികള്‍ രാത്രിയിലും കേട്ടു....
അങ്ങാടിയില്‍ സ്വീകരണം.പോഴാക്കത്ത് വെടിക്കെട്ട്‌.....
രാത്രി ഏറെ വൈകിയാണ് കാദര്‍ക്ക വീട്ടിലെത്തിയതെന്ന് ആരോ പറയുന്നത് കേട്ടു.

വലിയംപാടത്തെ സഖാവിന്‍റെ അനുജന്‍ കൊണ്ഗ്രസ്സായീന്നു നാലാള് പറഞ്ഞു ചിരിക്കുന്നതിലായിരുന്നു ഉമ്മാമ്മാക്ക് വിഷമം.

ഉമ്മാമ്മ പിന്നെ ഒന്നും മിണ്ടിയിട്ടില്ല 

ഇശാ നിസ്ക്കാരം കഴിഞ്ഞു ദുആ ഇരക്കുമ്പോള്‍ ഉമ്മാമ്മയുടെ കണ്ണുകള്‍ നിറഞ്ഞിരുന്നു.

''റബ്ബുല്‍ ആലമീനായ തമ്പുരാനേ....കോണ്ഗ്രസ്സിന്റെ അദാബില്‍4 *നിന്നും ഇന്റെ  മോനെ നീ കാക്കണേ...കമ്മ്യുണിസ് റ്റാര്‍ക്ക് വേണ്ടാത്തതൊന്നും തോന്നിക്കല്ലേ.....''

''ഓല് പൊറുക്കൂല്ല''.

നിസ്ക്കാരപ്പായ മടക്കി വെക്കുമ്പോള്‍ ഉമ്മാമ്മ പിറു പിറുക്കുന്നു.

കാദര്‍ക്ക രാത്രി ഏറെ വൈകിയും കാദര്‍ക്ക എത്തിയില്ല.

പുലര്‍ച്ചക്കാണ്  കടവത്തെ കാറ്റിനു തീ പിടിച്ചത്.....

വലിയംപാടത്തെ കാദറിനെയും കൂട്ടരെയും കമ്മ്യുണിസ്റ്റ്കാര് തല്ലി...കൊണ്ഗ്രസ്സുകാര് മുഴുവന്‍ ആശു പത്രിയിലാണ്.......''

കോലായില്‍ വന്നു കയറിയ പോലീസുകാര്‍ക്ക് മുന്നില്‍ ഉമ്മാമ്മ ആണായി നിവര്‍ന്നു നില്‍ക്കുന്നത് കണ്ടു ബദറു .....

''ഇനിക്ക് കേസില്ല....ഇന്റെ  മോനുംല്ല......ഇത് എന്ത് ചെയ്യണോന്നു മറിയത്തിനറിയാം......മറിയം അസ്സല് കമ്മ്യുണിസ്റ്റാ.......''

പോലീസുകാര്‍ക്ക് പിന്നാലെ പോവുകയായിരുന്ന കൊയ്യക്കാരന്‍ ചോയിയെ ഉമ്മാമ്മ പിന്നില്‍ നിന്നും വിളിച്ചു....

''ഇന്റെ  ഇളയോനാ ഓര് കൊല്ലാന്‍ നോക്കിയത് ...പൊറ്ക്കൂല്ല ഞാന്.....ഞാനും കമ്മ്യുണിസ്റ്റാ...ഇനിക്ക് പൊറുക്കാന്‍ കയ്യൂല്ല....''

മുറ്റത്തെ പൂവരശിന്റെ ചുവട്ടില്‍ നില്‍ക്കുന്ന ചോയിയോട്‌ ഉമ്മാമ്മ ഒച്ച താഴ്ത്തി.''ഇച്ചുറ്റുവട്ടത്തുകാര് തന്നെയല്ലേ ഇന്റെ  മോനേ തല്ലിയത്‌....?''

''അതെന്താ ഉമ്മറ്റിയാര്‍ക്കൊരു  തംശ്യം......?''ചോയി.

''ഓലൊക്കെ വെള്ളം കുടിക്കണത് നമ്മള്‍ കുഴിച്ചു കൊടുത്ത കിണ റിന്നല്ലേ.......കുളിക്കുന്നത് ഇത്തറവാട്ടിലെ കുളത്തീന്നല്ലേ......?''

അതിലും ഒരു സംശയമില്ലെന്നു ചോയി....

''ഇന്നാല് നാളെ മുതല് ഇന്നാട്ടില് മുഴുവന്‍കമ്മ്യുണിസം...എല്ലാരും കുഴിക്കട്ടെ ഓരോ കിണറ്.പാകത്തിന് കൊളോം.....നമ്മളെ ആവശ്യത്തിനു മുറ്റത്തൊരു കിണറ് മതി.ബാക്കിയൊക്കെ ഇന്ന് തന്നെ കൊത്തി മൂടണം.....''

കൊയ്യക്കാരന്‍ ചോയി തൊള്ള തുറന്നു പോയി.

ചോയിയുടെ പല്ല് മുഴുവന്‍ കറുത്തിട്ടാണെന്ന് കണ്ടു പിടിച്ചു ബദറു......

''ഒരു രാത്രി കൊണ്ടെങ്ങനാ ഉമ്മറ്റിയാരോ  കിണറായ കിണറോക്കെ കൊത്തി മൂടുക.....''

''പടയില്‍ തോറ്റാല്‍ പിന്നെ തൂറി അങ്ങോട്ട്‌ തോല്പ്പിക്കാന്നാണ് പത്തൊന്‍പതാമത്തെ അടവ്''.

സംശയിച്ചു നിന്ന ചോയിയോട് ഉമ്മാമ്മ പിന്നേയുമെന്തൊക്കെയോ കുശു കുശൂന്നു പറയുന്നത് മാത്രം കേട്ടു ബദറു.

''ഞമ്മക്ക് ബിശ്വാസം ഉള്ളോരെ മാത്രം വിളിച്ചാല്‍ മതി.കുളത്തില് ഒരു വണ്ടിചാണകം....കിണറ്റില് ഒരുമാറ്റംആയ്ക്കോട്ടെ.പത്തയാപ്പോരേല് എല്ല് പൊടിയുണ്ട്.....

അത് ഓരോ ചാക്ക് ഓരോ കിണറ്റിലും പാറ്റിക്കാളി.....നാറണം...നാരീട്ടു കുന്തിരിക്കം പൊഹയണം.....''

രാത്രി ഉമ്മാമ്മ ഉറങ്ങിയില്ല..

കോലായില്‍ മുറ്റത്ത്‌ തിളങ്ങുന്ന നിലാവ് നോക്കി ഉമ്മാമ്മ ഒരേയിരിപ്പ്...

വിയര്‍ത്തു കുളിച്ചു ചോയിയും കൂട്ടരും കയറി വരുമ്പോള്‍ ഉമ്മാമ്മ ചോദിച്ചു.

''ഒക്കെ ഉസാറാക്കീല്ലേ...''

''ബറാ ബറ്''

വിയര്‍പ്പാറ്റിക്കൊണ്ട് ചോയിയും കൂട്ടരും നിന്ന് ചിരിക്കുന്നു...
വായിലെ മുറുക്കാന്‍ ചണ്ടി മുറ്റത്തേക്കു നീട്ടിത്തുപ്പിക്കൊണ്ട് ഉമ്മാമ്മ മുരണ്ടു...
''ഇങ്കിലാബ്സിന്ദാബാദ്.''
മുറ്റത്ത്‌ പഞ്ചാര മണലില്‍ മുറുക്കിത്തുപ്പിയത് ചുവന്ന പൂക്കള്‍ പോലെ തിളങ്ങുന്നത് നോക്കി ബദറുഏറ്റു പറഞ്ഞു....
''വിപ്ലവം ജയിക്കട്ടെ......''

ബദറൂന് ചിരി വന്നു .ഉമ്മാമ്മക്കും വന്നൂ ചിരി  .ചോയിയും കൂട്ടരും പൊട്ടിച്ചിരിക്കുകയാണല്ലോ ............ 
*നാണക്കേട്‌ 
*മഹിമ 
*നാണം കെടുത്തുക 
*പ്രയാസം 

അടുക്കളക്കോളേജ്

ഏറെ നാളത്തെ ഇട വേളക്ക് ശേഷം   ആ കൂട്ടുകാരികള്‍ ഫെയിസ് ബുക്കില്‍ വെച്ചാണ്  കണ്ടു മുട്ടുന്നത് .

നിഹാല -നിലീന -നിലോഫറ  

''ഞാനിപ്പോള്‍ ഒരു മാനെജ്മെന്റ്  സ്കൂളില്‍ അധ്യാപികയാണ്.
ലക്ഷങ്ങള്‍ ഒരുപാട് കൊടുക്കേണ്ടി വന്നു,പോസ്റ്റ്‌ തരമാകാന്‍..............''

നിഹാല സങ്കടം പറഞ്ഞു .

നിലീനക്കും ഏറെ പറയാനുണ്ടായിരുന്നു .അവളും ലക്ഷങ്ങള്‍ എത്രയോ കൊടുത്താണ് നഗരത്തിലെ ക്രിസ്ത്യന്‍ കോളേജില്‍ ലക്ചറായി ജോയിന്‍ ചെയ്തിരിക്കുന്നത് .

ഒടുവില്‍ എല്ലാം കേട്ടിരുന്ന, ഈയിടെ മാത്രം വിവാഹിതയായ നിലോഫറ   ഇങ്ങനെ കമന്റിട്ടു .

''ലക്ഷങ്ങള്‍ എത്ര ചിലവായെന്നു കണക്കില്ല .......മാനേജര്‍ക്ക് ഒരു കാറും കൊടുക്കേണ്ടി വന്നു.......''

''ജോലി -അവിടുത്തെ കിച്ചണ്‍ കോളേജില്‍ ഒരു ലാസ്റ്റ് ഗ്രയിഡു ജീവനക്കാരിയായിട്ടാണെന്നു മാത്രം ..........''

അക്ഷരങ്ങള്‍ ടൈപ്പ് ചെയ്യുമ്പോള്‍ എല്ലാം മറന്നു ചിരിക്കാന്‍ ശ്രമിക്കുകയായിരുന്നു നിലോഫറ..........

പെരുമഴപ്പിറ്റേന്ന്..........

 പടിപ്പുര മാളികയുടെ തകര പ്പാത്തിയില്‍ കച്ചറ ഒച്ചയിട്ടു പെയ്യുന്നുണ്ട് പെരുമാച്ചി മഴ.
വെള്ളിയലുക്കുകള്‍ മിന്നുന്ന തട്ടത്തില്‍ മുഖം മറച്ച പുതിയോട്ടിയെ *
പോലെ പൂത്തുനില്‍ക്കുന്നുണ്ട് മഴ നനഞ്ഞു വേലിയിറമ്പത്തെ മയിലാഞ്ചി .
പൊന്നിന്റെ ഉറുപ്പിക വട്ടം തിളങ്ങുന്ന മാത്താവിന്റെ* ഞൊറികള്‍ ഓര്‍മ്മയില്‍ വന്നൂ ഉമ്മാമക്ക്.
മനക്കണ്ണില്‍ കൊളമ്പില്‍* നിന്നും കൊണ്ട് വന്ന സഹറാന്‍ കുപ്പായം ലങ്കി മറിയുന്നു .
പുള്ളിക്കുപ്പായമിട്ട ഓര്‍മ്മകളില്‍ പതിനാലാം രാവ്‌.
കിളി വാതിലിനപ്പുറം കോലടിച്ചാണല്ലോ പാടുന്നത് -ആടക്കോട മഴ!
മുറ്റത്ത്‌ റങ്കുന്ന മിന്നല്‍ വെളിച്ചത്തില്‍ മറ്റൊരു മിന്നായം പോലെ ഒരു വെള്ളക്കുപ്പായം !
ആ ........മിന്‍ഫോ......മിന്‍ഫോ .........തില്ല ...തില്ല ...........*
ഇതെന്തൊരു അത്ര്‍പ്പ ക്കിനാവ് ...........!
തമ്പാക്ക് മോതിരം ചിരിക്കുന്ന കൈകളാല്‍ കരിമ്പന ക്കോലിന്‍റെ വടക്കന്‍ വൈമലക്കൂത്ത്*.
''സുബ്‌ഹാനേ....ഇന്‍റെ മൂപ്പര് ........!!?''
മഞ്ഞു പഞ്ഞീന്‍ പോലെ വെളുത്ത  തലേല്‍ കെട്ടിന്‍റെ പൌസാക്കില്‍* ഉമ്മാമ്മക്ക് ചേപ്പറ*.
''മൂപ്പര് തന്നെ .'' 
കിളി വാതിലിലൂടെ പനിക്കൈകള്‍ നീട്ടി കാനൂല്* പറഞ്ഞു അവര്‍ ...
''നിക്കീ ..നിക്കീ ...ഞാനും ഉണ്ട് കൂടെ ..........''
കനത്ത കരിമ്പടക്കെട്ടില്‍ നിന്നും കാലുകള്‍ വലിച്ചൂരുമ്പോള്‍ കടിഞ്ഞൂലിനു നൊമ്പലം* കിട്ടിയ പോലെ വേദനിക്കുന്നല്ലോ .
ധൃതിയില്‍ ചെരുപ്പിടാന്‍ മറന്നു,വടിയും കുടയും മറന്നുള്ള ഉമ്മാമ്മയുടെ പടപ്പുറപ്പാട് കണ്ടു മുറ്റത്തെ മഴ, ഒരു നിമിഷം മിണ്ടാനാവാതെ നിന്ന് പോയി .
പിന്നെ,കാറ്റിലെ കളി ചിരി ഒപ്പനകള്‍ നിര്‍ത്തി വെച്ചു പനിനീര് കുടയും പോലെ പതിഞ്ഞ താളത്തില്‍ യാസീന്‍* ഓതിപ്പെയ്യാന്‍ തുടങ്ങി ..........
---------------------------------------------------------------------------------
*പുതിയോട്ടി =മണവാട്ടി 
*മിന്‍ഫോ...മിന്‍ഫോ ....=കോല്‍ക്കളിയിലെ ഒരു  വായ്ത്താരി.
*മത്താവ് =മലബാറില്‍ പ്രത്യേകിച്ച് കോഴിക്കോട്ടെ പഴയകാല മുസ്ലിം വധുവിന്‍റെ വിവാഹ വേഷം .
*കൊളമ്പ്‌ =കൊളമ്പോ.
*വടക്കന്‍ വൈമലക്കൂത്ത്= കോല്‍ക്കളിയിലെ ഒരു ചിട്ട.
*പൌസാക്ക്=ഭംഗി.
*ചേപ്പറ=നാണം.
*കാനൂല്=കിന്നാരം.
*നൊമ്പലം കിട്ടുക=പേറ്റു നോവ്‌ വരുക.
*യാസീന്‍ =വേദ ഗ്രന്ഥത്തിലെ ഒരു അദ്ധ്യായം, മരണ വീടുകളില്‍ പ്രത്യേകം പാരായണം ചെയ്യാറുണ്ട് ചിലര്‍.                                                  

കലിയന്‍

ഒരു മഴ നേരത്ത് നഗരത്തിലെ ഫ്ലാറ്റിന്‍റെ സ്വാസ്ഥ്യം നുകര്‍ന്നിരിക്കുന്ന അയാളോട് മകന്‍ പറഞ്ഞു..

''അച്ഛാ,അച്ഛനൊരു കഥ പറ...''

ജാലകക്കാഴ്ചയിലെ കറുത്തിരുണ്ട ആകാശം നോക്കിയിരിക്കവേ,ഉള്ളില്‍ ഒരു കഥ കനത്തു വരുന്നത് അയാള്‍ അറിഞ്ഞു......

ഇപ്പോള്‍ അങ്ങ് ദൂരെ,പുഴയോരത്തെ തറവാട്ടു  മുറ്റത്തു കര്‍ക്കിടകപ്പേമാരി തകര്‍ത്ത് പെയ്യുന്നത് പച്ചച്ചതഴപ്പായ് അയാള്‍ക്ക്‌ മുന്‍പില്‍........

അയാള്‍ കഥ പറഞ്ഞു തുടങ്ങി.........

''കലിയാ കലിയാ കൂയ് കൂയ്......ചക്കയും മാങ്ങയും കൂയ് കൂയ്...''

''അങ്ങനെ പറഞ്ഞാല്‍ ചക്കയും മാങ്ങയും കിട്ട്വോ....''വാക്കുകളില്‍ സംശയം 

നിറച്ചു കൊണ്ട് മകന്‍.....

''അതിലെന്തു സംശയം.....''ഉത്സാഹത്തോടെ അയാള്‍  പഴയ അഞ്ചു വയസ്സുകാരന്‍ കുട്ടിയായി.

മകനാവട്ടെ,ഉണ്ടക്കണ്ണുകളില്‍ കുസിര്‍തിത്തിരി  കത്തിച്ചു കൊണ്ട് പുറത്തു ആര്‍ത്തു പെയ്യുന്ന കര്‍ക്കിടക പ്പേമാരിയിലേക്ക് തന്‍റെ ആവശ്യമെറിഞ്ഞു.

''കലിയാ കലിയാ കൂയ് ,

കൂയ് .....കെ എഫ് സിയും ,കൊക്കോ കോളയും കൂയ് ....കൂയ് ..........!

നക്ഷത്രക്കണ്ണുള്ള പെണ്ണ്

കൂട്ടുകാരന് പെണ്ണ് കാണാന്‍ പോയപ്പോയാണ് ആദ്യമായി അയാള്‍ അവളെ കാണുന്നത്.

നീല വിരിയിട്ട ജാലകത്തിനപ്പുറത്ത് നിന്നും മിന്നുന്നൊരു നക്ഷത്രം കണക്കേ എത്തി നോക്കിയ ആ കണ്ണുകള്‍.......

''എനിക്കയാളെ ഒട്ടും  ഇഷ്ടമായില്ല..... പക്ഷേ,കൂടെ വന്ന ആളെ....'' അവള്‍ അച്ഛനോട് പറഞ്ഞു......

പിന്നീടെല്ലാം പെട്ടെന്നായിരുന്നു.

പൊന്ന്‌ മിന്നുന്ന പുടവയും  നക്ഷത്രം പൂത്ത കണ്ണുകളുമായി വിവാഹ മണ്ഡപത്തില്‍ അയാളുടെ അരികിലായി അവള്‍ ഇരുന്നു.
ആദ്യ രാത്രിയില്‍ അയാള്‍ പറഞ്ഞു;

''ഇനി മുതല്‍ ഞാന്‍ കണ്ണാടിയില്‍ നോക്കില്ല...പകരം നിന്‍റെ കവിളത്ത്.....''

അത് കേട്ട് മദിച്ച് പൂത്ത കുട മുല്ലത്തയ്യ്‌ പോലെ അവളാകെ പൂത്തുലഞ്ഞു പോയി....

ഇണയുടെ കവിളില്‍ കണ്ണാടി നോക്കി കാലം കഴിയവേ,ഊതിയിട്ടും കെടാതെ കത്തുന്ന അവളുടെ കണ്ണിലെ നക്ഷത്രത്തിളക്കം അയാളെ വല്ലാതെ അസ്വസ്ഥത പെടുത്താന്‍ തുടങ്ങിയിരുന്നു ........

അങ്ങനെയാണ് കൂട്ടുകെട്ടുകളുടെ കണ്ണാടിച്ചില്ലുകൾ ഓരോന്നായി തച്ചുടക്കാന്‍ തുടങ്ങിയത് അയാള്‍....
ഒടുവിലൊരു ദിവസം അവളുടെ കണ്ണാടിക്ക വിളിലും പതിഞ്ഞു അയാളുടെ കൈപ്പടം ..........!!!

ഇര തേടുന്ന അമ്മ

ഒരു പ്രവര്‍ത്തി ദിനത്തിന്‍റെ എല്ലാ രൌദ്ര ഭാവങ്ങളും ഏറ്റു വാങ്ങിയ ഒരു

തിങ്കളാഴ്ചയി ലേക്കാണ് മാലിനി ടീച്ചറുടെ പ്രഭാതം കണ്ണ് തുറന്നിരിക്കുന്നത്.

ഒരിക്കലും ഉറങ്ങാതെ,ജീവിതവും കവച്ചു വെച്ച് ഓടിക്കൊണ്ടിരിക്കുന്ന ക്ലോക്ക് സൂചി തന്നെ നോക്കി പരിഹസിക്കുന്ന പോലെ തോന്നി ടീച്ചര്‍ക്ക്‌...................

ഉറക്കമുണര്‍ന്നാല്‍ തല വേദന -തൊണ്ടയും മൂക്കും അടച്ചു കെട്ടുന്ന അസ്വസ്ഥത.

വേവലാതികളില്ലാതെ പുറം തിരിഞ്ഞുറങ്ങുന്ന ഭര്‍ത്താവിന്നും നിലത്തു കോസടി വിരിച്ചുറങ്ങുന്ന മക്കള്‍ക്കുമിടയില്‍ ഒരു നിമിഷം എല്ലാം മറന്നു അവള്‍ ഇരുന്നു...

പുറത്തു ലോകം പൂര്‍ണ്ണമായും  ഉണര്‍ന്നു കഴിഞ്ഞിരുന്നു.......
ഭര്‍ത്താവിനും കുട്ടികള്‍ക്കും ഓഫീസിനും സ്കൂളിനുമിടയില്‍ ചക്ക് കുറ്റിയില്‍ കെട്ടിയ എരുതിനെ പ്പോലെ ടീച്ചറുടെ ഒരു ദിവസത്തെ ജീവിതം
അടുക്കളയില്‍ ചുറ്റിത്തുടങ്ങുകയാണ്.


തലേ രാത്രിയിലെ അശ്രദ്ധയില്‍ കൂടയില്‍ നിന്നും രക്ഷപ്പെട്ട പാമ്പിനെ പ്പോലെ അടുക്കളയില്‍ പതിയിരിക്കുന്ന ദുരന്ത സാന്നിധ്യം ടീച്ചര്‍ അറിഞ്ഞതേയില്ല.
തീപ്പെട്ടിക്കോലുരച്ചു ബെര്‍ണറിലേക്ക് നീട്ടും മുമ്പേ.......
ഗ്യാസുകുറ്റിയിലെ പാമ്പ് ആയിരം തീനാവുകള്‍ നീട്ടി....
മുഴുവനും വെന്തു പോയ ശരീരത്തില്‍ നിന്നും ജീവന്‍റെ കെട്ട്ഊരിയെടുത്തു യാത്രയാവുമ്പോഴും ടീച്ചറുടെ നെഞ്ചകത്ത് വേവലാതി തീര്‍ന്നിരുന്നില്ല...ഭര്‍ത്താവ്.... കുട്ടികള്‍.....  ബ്രേക്ക് ഫാസ്റ്റ്..... സ്കൂള്‍ .......

                                                                                               

ജംഗമ വിളക്ക്

എല്ലാം വീതം വെച്ചു കഴിഞ്ഞപ്പോള്‍  തറവാട്ടില്‍ അഞ്ചു ജംഗമ വസ്തുക്കള്‍ മാത്രം ബാക്കിയായി .....

ഒരു  പിച്ചളക്കോളാമ്പി,വെള്ളോട്ട് കിണ്ടി വെത്തില താമ്പാളം ചങ്ങല വട്ട,പിന്നെ .......

പോളിഷ് ചെയ്താല്‍ ഡ്രോയിംഗ് റൂമില്‍ പൂപാത്രമായെന്നു കരുതിക്കൊണ്ട് പിച്ചളക്കോളാമ്പി സുമിത്രയാണ് എടുത്തത്‌.

ആര്‍ക്കും വേണ്ടാത്തത് ഞാന്‍  എടുക്കുന്നു എന്ന ഭാവത്തില്‍ വെള്ളോട്ട് കിണ്ടി സാവിത്രിയും കയ്യിലാക്കി ...

ബോഫെ നടത്തുമ്പോള്‍ വെള്ളി കെട്ടിയ വെത്തില തമ്പാളത്തില്‍ ഡ്രൈ ഫ്രൂട്സ് വിളമ്പാമെന്നു അടക്കം പറഞ്ഞത് ജയപാലന്‍റെ ഭാര്യ.....

ചങ്ങല വട്ട ജയരാമനും പങ്കിട്ടു.........

ഒടുവില്‍ ആര്‍ക്കും വേണ്ടാതെ എല്ലാവര്‍ക്കും അവകാശപ്പെട്ടു തറവാട്ട്‌ മൂലയിലെ ജംഗമ വിളക്ക് പോലെ........

'' അമ്മക്ക് അവിടുത്തെ കാലാവസ്ഥ പിടിക്കൊന്നു തോന്നണില്ല ...''

മൂത്ത മകള്‍ ആദ്യമേ പറഞ്ഞിരുന്നു.

''ഈ വലിയ തറവാട്ടില്‍ ജീവിച്ച അമ്മയെങ്ങിനെയാണ് എന്‍റെ കൊച്ചു ഫ്ലാറ്റില്‍ അഡ്ജസ്റ്റ്  ചെയ്യുക.....''ഇളയവളും പറഞ്ഞു.

ജയപാലന്‍റെ ഭാര്യയാണ് ആകെ സങ്കടപ്പെട്ടു പോയത്......

''ഗുരുവായൂരപ്പാ...അമ്മ നമ്മുടെ മാര്‍ബിള്‍ പതിച്ച നിലത്തെങ്ങാനും വഴുതി വീണാലോ......?''

ജയരാമന്‍ ഭാര്യയുടെ മുഖത്തേക്കാണ് നോക്കിയത്.അവളാകട്ടെ കണ്ണുകള്‍ പാതിയടച്ച്‌ ഏതോ ഒരു വൃദ്ധ സദനത്തിലെ ഫോണ്‍ നമ്പര്‍ ഓര്‍ത്തെടുക്കുവാന്‍ ശ്രമിക്കുകയായിരുന്നു....................................

അവള്‍

ആദ്യമായ്  കണ്ടപ്പോള്‍ അവളൊരു മയില്‍ പേടയാണെന്നാണ് അയാള്‍ക്ക്‌ തോന്നിയത്.......

അടുത്തപ്പോള്‍ മനസ്സിലായി അവളൊരു മാടതത്തയാണെന്ന്................

വിവാഹ മണ്ഡപത്തിലേക്ക് ഒരു അരയന്നപ്പിട പോലാണവള്‍ കടന്നു വന്നത്........

അന്നവള്‍ ഒരു കൂരിയാറ്റയെ പോലെ അയാളുടെ ജീവിതത്തിലേക്ക് ചിറകൊതുക്കി...........

പിന്നീടിങ്ങോട്ട്‌ ഒരു പിടക്കോഴിയെപ്പോലെ അവള്‍ അയാളുടെ കുറ്റവും കുറവും ചികയാന്‍ തുടങ്ങുകയായിരുന്നു....

ഒരു സുപ്രഭാതത്തില്‍ അയാളുടെ കരളില്‍ കൊത്തി, പുതിയ കൂടും തേടി അവള്‍ യാത്രയായപ്പോള്‍ 

മാത്രമാണു മനസ്സിലായത്. അവള്‍ ഒരു കരിങ്കള്ളിക്കാക്കയും കൂടിയായിരുന്നെന്ന്................

                                                                     

                                          

പ്രയാസി

'ആണുങ്ങളായാല്‍ കുറച്ചൊക്ക കാര്യബോധം വേണം '.അവള്‍ പറയുന്നു .

അയാളാകട്ടെ മുറ്റത്ത്‌ പൂത്തിറങ്ങിയ ആതിര  നിലാവില്‍ കണ്ണ് നട്ട്‌ അങ്ങനെ.......

'ഒക്കെ നമ്മുടെ നല്ലതിനല്ലേ ......?നമ്മുടെ മക്കള്‍ക്ക്‌ വേണ്ടിയല്ലേ....?''  

മിഴികളിൽ കർക്കിടകപ്പേമാരി നിറച്ച് കൊണ്ട് അവള്‍ ഒടുവിലത്തെ ആയുധവും പുറത്ത് ഏടുക്കുന്നു ........

സൗദിയിലേക്കാണ്, മൂന്നു കൊല്ലമാണ്, അത് വരെ.....നാടുവിട്ടു .....കൂടുവിട്ടു ....കൂട്ടരെ വിട്ട് .......

ദൈവമേ........നെഞ്ചിലടിക്കുന്നത് സങ്കടത്തിന്റെ    മരുക്കാറ്റോ......?

ഒരുപാടു കൂട്ടിയും അതിലേറെ കിഴിച്ചും അത് കൊണ്ട് ഗുണിച്ചും പിന്നെ ഹരിച്ചും ഒടുവില്‍ ഒരു പ്രവാസിയാകാന്‍ തന്നെ തീരുമാനിച്ചു അയാള്‍ ......

''അച്ഛന്‍ പോവരുത് ......''

അമ്പിളിക്കണ്ണുകളിൽ നീർ  തുളുമ്പിക്കൊണ്ട് മകന്‍........ 

''ഇല്ല മോനെ .......നിന്നെവിട്ടെങ്ങോട്ടുമില്ലച്ഛന്‍ ........''ഏന്നൊരു കണ്ണീരുമ്മയില്‍ നനയവേ .........

മകന്‍ പറയുന്നു .

''അച്ഛന്‍ ഇപ്പൊ ഈ ഇരുട്ടത്ത്‌ പോവണ്ടാന്നാ പറഞ്ഞത്  ......
നാളെ നേരം വെളുത്തിട്ട് -ഒരു വലിയ പെട്ടി ഒക്കെ  എടുത്തിട്ട് ,
അവിടെ എത്തിയാലുടനെ മോന് ലാപ്‌ ടോപ്പ് ,ഐഫോണ് ,ടാബ് ലെറ്റ്‌ ,പിന്നെ .............''